إزاي تطلع الأول علي الدفعة؟

في البداية خليني اقولك إن ما عليك سوي السعي والتوكل، والتوفيق من الله سبحانه وتعالى، ولا نختلف إن فرحة النجاح والتفوق من أسعد لحظات حياتنا مع نظرة الفخر في عين أهلك واللي بيحبوك.

فإليك بعض النصائح:

-كن منظم ومسؤول

في فترة الجامعة أنتَ بتتحرر من تحكمات كتير مختلفة، مبيكونش عليك المراقبة اللي كانت في المدرسة، فأنا محتاج تتعلم تبقي مسؤول عن نفسك ودراستك وإحتياجاتك

تتعلم تدير وقتك وتنظمه وتحدد لنفسك أهداف واقعية.

-حضور المحاضرات

مش شرط حضورك جميع المحاضرات عشان تبقي الأول علي الدفعة، أنتَ محتاج تعرف المحاضرات المُفيدة واللي هتستفاد منها وتحضرها، لأن المحاضرات اللي أنتَ مبتفهمش أو بتستفاد منها فهي بتبقي تضييع لوقتك وطاقتك.

-متتكسفش

متتكسفش تسأل عن حاجة مش واضحة ليك أو مش فاهمها كويس ومحتاج إعادة شرح ليها.

-ركِّز علي التعلُم مش التعليم

ركز إنك تفهم المواد وتفهم أغلب الثغرات ونظام الدكاترة والإمتحانات وما إلي ذلك، مش بس تركز علي إنك تجيب أعلي درجة بأي طريقة.

 وحاول تركز علي المصادر الإضافية زي الكتب والمواقع الإلكترونية وغيرهم من المصادر عشان تساعدك إنك تبقي مُميز.

-اتعلم البحث

البحث أحد المهارات الأكاديمية والمهنية المهمة اللي لازم تبقي عندك، اتعلم ازاي تبحث عن شئ معين؟ وإزاي تعرف المصدر الصحيح؟

-لا للتراكم

متراكمش اللي عليك، خلص مذاكرتك أول بأول

اعمل جدول يومي للمذاكرة وجدول أسبوعي للمراجعة؛ لأن دا هيقلل من توترك وقلقك فترة الإمتحانات وهيساعدك تحدد إيه اللي محتاج تركز عليه الفترة الأخيرة ومحتاج منك مراجعة أكتر وشوية مجهود.

-ساعد غيرك

افتكر دايماً إن "الله في عون العبد مادام العبد في عون أخيه"

متبخلش علي حد بأي معلومة، لو عندك معلومة وحد سألك متهربش منه لمجرد إنك مش عايز حد يشاركك نجاحك، تذكر إن النجاح رزق وكل حد بياخد رزقه.

-خليك اجتماعي

اتكلم مع الكل واعمل علاقات علي قد ما تقدر لكن خليك حذر في علاقاتك متصاحبش أي حد لمجرد إنك محتاج صحاب، الجامعة مليانة بجميع طوائف المجتمع وأكيد فيهم أصدقاء سوء فاحذر منهم.

-النشاطات الجامعية

شارك في النشاطات الجامعية لأن ليها دور كبير في بناء شخصيتك وتطويرها، متركزش بس علي الدراسة والتعليم وتنسي تطوير نفسك لحياتك المهنية والعملية.


في النهاية خليك مستعِد للتحدي ومواجهة العقبات وتخطيها، متخافش من السعي ورا أحلامك وطموحاتك مهما استهزء بيها اللي حواليك.