"ازاي ترجّع البيضة المسلوقة لحالتها الطبيعية؟!"

"جيت تفطر وكنت بتسلق بيض، خطر في بالك... يا ترى هو احنا ممكن نرجع البيضة المسلوقة نية تاني. "

"اللي اتضح إن اللي بتعمله الطاقة الحرارية في الجزيئات (اللي هو تماسك الجزيئات)، الطاقة الميكانيكية تقدر تعمل العكس.

البيض بيتكون من بروتينات وماء، البروتينات ديه بتكون معقدة ومرتبطة ببعضها بروابط كيميائية ضعيفة، فلما بنديها طاقة حرارية (التسخين) البروتينات ديه بيحصلها حاجة اسمها (Denaturation) الروابط بتتكسر وبتتفك عن بعضها.

 البروتينات بقى بتبدأ تتصادم مع بعض فيكوّنوا روابط جديدة مع بعضهم، والروابط ديه بتزيد بزيادة درجة الحرارة، لحد ما نلاقيهم تشابكوا جدا مع بعض وكونوا كتلة صلبة ألا وهي (البيضة المسلوقة). 

التشابك ده بقى ممكن نكسره أو نفككه عن طريق مبدأ اسمه الانعكاسية المجهرية، أي حاجة بتحصل زي جمود بروتينات البيض ممكن يتلغي لو عكسنا الخطوات. 

طب يا ترى بالتبريد مثلا؟ 

لا، لان التبريد هيجمد البروتينات بس مش أكتر، بل هندورها حول نفسها بسرعة كبيرة جدًا. 

طب العلماء بيعملوا ايه؟

 بيحطوا بياض البيض مع مادة اليوريا (بتسهل من انزلاق البروتينات مع بعض فيسهل تفككها) في الماء في أنبوبة زجاجية، وبعدين بندور الانبوبة ديه بسرعة 5000 دورة في الدقيقة الواحدة باستخدام جهاز الطرد المركزي، فالمحلول بينتشر في طبقة رقيقة.

المحلول اللي بيكون قريب من الجدار بيلف أسرع من المحلول اللي في المنتصف، فرق السرعة ده بيعمل إجهادات بتخلي البروتينات ديه تتمدد وتنكمش بشكل متكرر، لحد ما ترجع لشكلها الأساسي وتستقر، وبيرْجَع بياض البيض لحالته الأصلية قبل السلق لما آلة الطرد المركزي تتوقف عن الدوران. 

طب ديه الفايدة الوحيدة... لا، لأن التقنية ديه بتنفع مع كل أنواع البروتينات، بس البروتينات الأكبر والأكتر تشتتًا بتقاوم التفكك.

 طب العلماء بيعملوا ايه في المشكلة ديه... بيعلقوا خرزة بلاستيكية في أحد أطرافها، وده بيضيف ضغط عليها فبيحفزها على الإلتفاف. 

طب ايه الاستفادة من إن احنا نرجّع البروتينات لحالتها الأصلية... المستحضرات الطبية والأدوية بتتكون من بروتينات غالية جدًا، وده بسبب إنها بتكون متجمعة في كتل متشابكة زي بياض البيضة المسلوقة، فلازم نفك التشابك بتاعها ونعيد ترتيبها تاني عشان تقوم بوظايفها."

"الطريقة ديه بتكون أسهل وأسرع وأرخص لإعادة ترتيب البروتينات عن الطرق التانية اللي هتكون مكلفة جدًا، فنقدر نوفر أدوية ومستحضرات طبية تانية كتيرة بشكل أسرع."