أفضل6 طرق للتغلب على مشاكل الدراسة!

أكتر حاجة محتاجين إننا نتكلم عنها وخاصةً الفترة دى هي مشكلات الدراسة.

كتير مننا بيصعُب عليه الإستمرارية في إكمال أو إنهاء واجباته أو مهامه الدراسية.

فتعالى أقولك على أهم المشكلات دى وإزاي تتغلب عليها فأقصر وقت وتبقى أكثر إنتاجية فى دراستك.

من أهم وأكثر المشكلات اللي بتواجه كتير مننا فى الدراسة:-

1-النوم:

كل الطلبة بتتعرض إنها تشعر بالنوم فى الحصة الدراسية أو إثناء دراستهم فى البيت؛ وده ممكن بيرجع لحاجتين يا أما الطالب مش نايم كويس، أو المادة اللي بيذاكرها مملة وهو مش عارف يتأقلم معاها.

فضبط النوم مهم جدًا قبل الدراسة عشان الطالب يكون فايق ومركز وأكثر إنتاجية.

2- الملل:

 الملل مشكلة شائعة جدًا وكتير من الطلبة بيفقدوا تركيزهم وبيملوا بسرعة وبيستسلموا وده ليه أسباب كتيرة جدًا منها:

- إنه كان متعود يعمل أو يمارس رفاهيات وحاجات كتيرة وفجأة يدخل في زون الدراسة فطبيعي هيمل بسرعة.

-وكمان الراحة وطرق التغذية السليمة من أسباب تعرض الطالب للملل السريع. 

3-السرحان:

أكيد معظمنا بيسرح اثناء اي عمل بيعمله سواء كان دراسة أو شغل حتى اغلبنا بيسرح في الصلاة وده بيؤدي إلى تدني التحصيل الدراسي  عند الطلاب وده بيرجع لأسباب كتير منها:

 أن الطالب  معندوش هدف أو دافع يحفزه عشان يكمل مهامه، أو إنه مشغول بأمور تانية عن الدراسة، أو فيه مشاكل عائلية مؤثرة على عقله وتفكيره، واكيد ده كمان بيرجع لأسباب نفسية مثلًا إن الطالب ده مش حابب المادة اللي بيذاكرها أو طريقة التدريس اللي بيتلقاها الطالب مش مناسة ليه، أو إن الطالب يفضل يفكر إيه اللي هيحصل بعد كده ؟ايه اللي انا هواجهه؟ إيه النتيجة المستقبلية من اللي بدرسه؟

4-اضطراب نقص الإنتباه وفرط النشاطADHD:

الاضطراب ده واحد من الاضطرابات الدماغية اللي الشخص بيتولد بيها أو كمان ممكن يصاب بيه بعد الولادة بعد بوقت قصير .

وفي الاضطراب ده  الطالب مش بيكون قادر على التركيز على شيء معين ولكن بيركز مع كل اللي حواليه.

5-النسيان:

أكيد كلنا بننسى بس عند الطالب المدرسي لازم نكون أكثر حذرًا من الموضوع ده ازاي؟!

  الطالب المدرسي بيعاني  من النسيان بشكل كبير ولكن ده ليه اسباب زي مثلًا نقص الفيتامينات، النوم الغير منتظم، وفي طبعُا أسباب كتير للنسيان نتجنبها ونتفادى أثرها إزاي ؟

 عن طريق إننا ناكل أكل كويس فيه كل الفيتامينات اللي جسمنا بيحتاجها ، ننام كويس.

6-كثرة المشتتات:

الطالب لما يحب يبدأ الدراسة أو المذاكرة بتاعته لازم يختار مكان فيه مشتتات أقل يعني مثلًا  ميختارش الأوضة اللي فيها التيليفزيون، ميختارش مكان فيه أطفال،  ده حتى المكتب اللي أنا بذاكر عليه لازم يتوضب، لازم يتنظم بحيث أحط عليه كل حاجة المادة اللي أنا هذاكرها بس  .

7- الحالة النفسية اللي بيمر بيها الطالب:

 ممكن الطالب في أي فترة من الفترات يمر بحالة نفسية سيئة.

 ممكن تكون فيه خلافات عائلية بتؤثر عليه وده شيء بديهي ممكن يحصل في أي بيت عادي،أو إنه يكون بيعاني من القلق أو الخوف من شيء معين.

ممكن الطالب يشعر بالإكتئاب بسبب جو المدرسة اللي مش متعود عليه أو إنه منتقل جديد لمدرسة جديدة ولسة متأقلمش ومكونش صحاب، وممكن يكون بيعاني من عدم القدرة على تكوين صداقات جديدة.

الإحساس بالغيرة من زملائه فالصف وارد جدًا. 

إنه يكون خجول زيادة ده هيأثر أكيد فإنه هيخجل يسأل لو مش فاهم أي حاجة.

ضعف الثقة فالنفس من المشكلات النفسة المؤثرة جدًا على الطالب فى المدرسة.

طب إزاي أتجنب وأتفادى المشاكل دي كلها؟!

من أهم النصائح اللي هقدمهالك وهتساعدك فالموضوع ده:

1-أولاً هتستعين بالله وتسمي ولو حابب تقول دعاء المذاكرة يبقي كويس جداً.

2-قلل إستخدام التيليفونوالسوشيال ميديا على قد ما تقدر، وإقفله خالص وأنت بتذاكر؛ لأن معركتك مع التيليفون لو انتصرت عليه فيها إنت كده نجحت فأول خطوة وقللت مشتتات شوية.

3- الأكل يكون صحي وفيه مواد غذائية عالية وفيتامينات وبلاش ناكل من برا كتير.

4-إنك تقرأ الدرس أو الجزء اللي عليه وهتاخده قبل ما تروح المدرسة أو الدرس ده هيسهل عليك انك تفهم أسرع عشان هتكون آخد فكرة عن الموضوع ولو بسيطة.

5-طبعا لكل طالب طريقة فالمذاكرة فإنك تختار طريقة حديثة وفعّالة زي انك تقرأ الدرس أكتر من مرة وبعدين تكتبه بشكل جزأي دي هتنجز معاك كم كبير وزي ما أنت عايز بقا، وكمان اختيار المكان المناسب للدراسة يعنى مثلاً تبعد عن مكان النوم؛ لأنه تلقائيًا دماغك هتفهم إنك هتنام فهتنام.

6-النوم المنتظم وعدم السهر هيديك إنتاجية أعلى.

لازم أخصص عدد ساعات ميقلش عن 7-8 ساعات يوميًا.

وأخيرًا وليس آخرًا : أوصيك بقراءة كتاب "تعلم كيف تتعلم" هيفيدك جدًا.

كده تكون اتعرفت على أهم المشاكل اللي بتواجهنا كلنا فالدراسة وإزاي نتغلب عليها بشكل كويس.

فهمت؟!

روح ذاكر بقا 😊🤩.