إزاي أحافظ على صلاة الفجر؟

كلنا عارفين إن الصلاة هي أول ما يحاسب عليه العبد يوم القيامة، وإن من دلائل حب الله للعبد هو توفيقه للصلاة والوقوف بين يديه. 

ولكن أحياناً بنتغافل عن فكرة الصلاة في وقتها، مع أن كلنا عارفين إن " أحب الأعمال إلى الله الصلاة في وقتها"، ومن أكتر الصلوات اللي بنكسل عن صلاتها في وقتها هي صلاة الفجر. 

وربنا سبحانه وتعالى اختص صلاة الفجر بمكانة كبيرة، لأنه سبحانه وتعالى عالم بقدر المشقة اللي بيعاني منها الشخص اللي بيقوم من نومه وبيقلق راحته ومنامه علشان ربنا سبحانه وتعالى يكون راضي عنه. 

ولصلاة الفجر فوائد ومنافع عظيمة وكبيرة، مش بس في الآخرة بس، كمان في الدنيا.

 ومن أهم الفوائد لصلاة الفجر في وقتها: 

١- قال رسول الله صلِّ الله عليه وسلم " ليس صلاة أثقل على المنافقين من الفجر والعشاء، ولو علموا ما فيها لأتوهما ولو حبوا ". 

٢- قال رسول الله صلِّ الله عليه وسلم "ركعتا الفجر خير من الدنيا وما فيها"، والعلماء قالوا إن النبي صلّ الله عليه وسلم كان يقصد سنة الفجر، فلو كان دا فضل السنة، تفتكر ايه هيكون ثواب الفرض. 

٣- قال رسول الله صلِّ الله عليه وسلم" بَشِّر المَشَّائين في الظلمات بالنور التام يوم القيامة"، ودا إشارة لصلاة الفجر وصلاة العشاء. 

٤- وصلاة الفجر من أهم أسباب جلب البركة في الرزق، وقال رسول الله صلِّ الله عليه وسلم " اللهم بارك لأمتي في بكورها". 

وفوائد صلاة الفجر العظيمة لعلم ربنا سبحانه وتعالى بالمشقة اللي بتحصل عشان نقوم من النوم ونتوضأ ونصلي، ومش بيبقي في أي هدف لينا غير رضاه سبحانه وتعالى. 

إزاي تحافظ على صلاة الفجر في وقتها: 

١- لازم تعرف كويس أهمية الصلاة وبالذات في وقتها ، وقيمة صلاة الفجر في وقتها، و النعم اللي ربنا سبحانه وتعالي بيكرمك بيها في الدنيا والآخرة لما تحافظ عليها. 

٢- زي ما كلنا عارفين إن زي ما في ناس مننا بتيجي بالترغيب، في ناس تانية بتيجي بالترهيب، علشان كدا لازم تعرف وتسمع وتقرأ عن خطورة ترك صلاة الفجر وعدم صلاتها في وقتها. 

٣- نام بدري علشان تقدر تقوم، ماهو مش طبيعي إنك تنام قبله بساعة أو اتنين أو حتى تلاتة وتقدر تقوم، علشان كدا لازم تظبط نومك وانت هدفك الأساسي إنك تقوم لصلاة الفجر. 

٤- قبل ما تنام استغفر من كل ذنوبك، وانوي التوبة بنية صادقة، لأن الذنوب من أول وأهم الحاجات إللي بتشغلنا عن الطاعة وتمنعنا منها. 

٥- يفضل تنام على وضوء وتقول كمان أذكار النوم. 

٦- قبل ما تنام ادعي ربنا كتير إنك تقوم علشان صلاة الفجر، وأنه يعينك ويقدرك على الصلاة في وقتها. 

٧- متنساش النية علشان النية الصادقة في أي حاجه في حياتك من أهم أسباب الوصول لكل شيء تتمناه، علشان كدا أنوي إنك هتقوم لصلاة الفجر في وقتها. 

٨- اظبط المنبه من قبل الفجر بخمس دقايق ولحد قبل الشروق، وخلي الموبايل بعيد منك، علشان تضطر تقوم تقفله، ولو قومت أكيد هتصلي. 

٩- خلي عندك صحبة صالحة تعينك وتساعدك وتفكروا بعض وقت الصلاة، وتاخدوا بإيد بعض إلى الجنة. 

علشان كل دا مينفعش إنك تأخر صلاة الفجر، تخيل معايا إنك تبدأ يومك بمجاهدة نفس علشان تقف بين إيدين ربنا سبحانه وتعالى وأنت كل همك ومناك أنه يرضي عنك ويجعلك من أهل الفجر وأهل الجنة.