كيف نحافظ على نفسيتنا من الضغوطات؟
الحياة مليانة بالضغوطات في مختلف مجالاتها، والضغوطات ديه أمر طبيعي إنك تعاني منها، فمحتاجين نعرف أسبابها وإزاي نحافظ علي نفسيتنا منها؟
أسباب الضغط النفسي:
-ضغوطات العمل أو المدرسة بسبب الروتين المستمر.
-الضغط بسبب المرض أو مشكلة أو أزمات مالية .
-الضغوطات بسبب العلاقات الإجتماعية والأسرية.
-الضغط بسبب القلق من المستقبل.
كل ديه أسباب تؤدي للضغوطات النفسية والحياتية، فإزاي نحافظ على نفسيتنا من هذه الضغوطات؟
كيف نحافظ على نفسيتنا من الضغوطات؟
-تعلم كيف تحدد مصادر الضغط في حياتك.
عشان تحل أي مشكلة فأنتَ في البداية لازم تحدد مصدرها، - والضغط مُشكلة - فأنتَ لازم تعرف إيه مصدر الضغط في الفترة ديه، هل مصدرها شغل، مرض، علاقات،…؟
-محاولة تحقيق التوازن في أمور حياتك.
مهم إنك تحقق التوازن في أمور حياتك المختلفة، ممكن تكون مش أسهل خطوة لكنها خطوة مهمة جداً، ومن أهم الحاجات اللي هتساعدك في دا هو تنظيم الوقت، بمجرد تنظيمك لوقتك فأنت قللت نسبة كبيرة من الضغط.
-تحديد الأولويات.
تنظيمك لوقتك خطوة أولي وتحديدك لأولوياتك خطوة تانية، إنك تحدد الحاجات المهمه وتمشي بمقولة " الأهم ثم المُهِم ".
-تعلم كيف تقول لأ.
إنك تكون شخص لطيف أكتر من اللازم دا مش هيعطيك جايزة - أشطر شخص لطيف -، بالعكس دا هيضغطك أكتر.
فأتعلم تقول لأ، لأ للحاجات اللي مش مهمة، للمسئوليات الزيادة، للوقت الغير مناسب،…
-التواصل مع الأشخاص.
ممكن تتكلم مع شخص قريب منك سواء كان صديق أو فرد في عيلتك أو غيره، - لكن اختار صح - شخص يسمعك ويساعدك في تخفيف الضغط عن نفسك، مش شخص يزوِد العِبء عليك، فاختار دايرتك في رحلة الضغط صح.
-التعبير عن المشاعر والأفكار.
من أهم طرق المحافظة علي نفسك من الضغط هي التعبير، عبَّر عن مشاعرك أياً كانت: غضب، يأس، حزن،…
لازم تواجه مشاعرك وأفكارك وتفرغهم من دماغك بأي طريقة، ممكن يبقي عن طريق الكتابة أو إنك تتكلم مع شخص.
-تناول ماهو صحي.
صحتك النفسية أو الجسدية الاتنين متاربطين، تغذيتك لعقلك وجسمك تغذية صحية صحيحة بيفرز فيتامينات ومعادن بتساعد إن يكون عندك توازن صحي ومنه يؤدي الي توازن نفسي، فهتقلل الضغط اللي ممكن تحس بيه.
-ممارسة الرياضة.
الرياضة بتساعدك في التخلص من التوتر والقلق وغيرهم من مشاعر اللي بتكون من أسباب الضغط، ومن أهم وأفضل أنواع الرياضة ديه هي اليوجا.
-فترات الراحة المنتظمة.
إنك تاخد فترات راحة بشكل منتظم مش رفاهية إختيار، لازم يبقي عندك وقت راحة تامة من كل شئ، مش شرط الوقت دا يكون بعد لما تحس بتعب، كما يُقال (الوقاية خير من العلاج) فإنك تاخد أوقات للراحة بعد مهمة معينة - حتي لو حاسس إنك متعبتش - فأنتَ كدا بتحافظ علي نفسك من الضغط فيما بعد.
مهم جداً إنك تحدد وقت لحاجة أنتَ بتكون مستمتع وأنتَ بتعملها♥
أوقات الراحة من أهم طرق المحافظة علي نفسك من الضغط في الحياة.
تعليقات
إرسال تعليق
شاركنا بتعليقاتك