نصائح لطلاب الصف الثالث الثانوي
مفيش شك إن تالتة ثانوي سنة مهمة وفاصلة في حياة ناس كتير، لكن متخليش
الخوف والقلق يسيطروا عليك، وخليك عارف أن كل حاجة بتنظيم الوقت والترتيب الجيد
سهلة، وتقدر تحقق أفضل النتايج لو نظمت وقتك ورتبت أمورك صح من أول يوم.
النهارده هديك شوية أفكار ونصايح تساعدك تحقق هدفك وتوصل لأفضل النتايج بإذن الله.
أول حاجة خليك عارف إن لكل مجتهد نصيب، وإن ربنا عز وجل بيقول في كتابه
الكريم "إنا لا نضيع أجر من أحسن عملًا)
وهي فعلًا سنة مهمة وفاصلة، لكن مش مستحيل إنك تحقق هدفك وتوصله زي ما في الملايين غيرك وصلوا لده في السنوات الماضية.
أهم النصائح اللي هتفيدك هي:
1-
حط خطة للمذاكرة، أعرف ايه المواد اللي
هتحتاج منك مجهود أكتر في المذاكرة من غيرها، وحدد كل مادة منهم هتحتاج وقت اد ايه
أسبوعيًا للدراسة.
2-
حدد مكان مريح لمذاكرتك، يكون هادي وإضاءته جيدة
وفيه كرسي مريح ومكان لترتيب كتبك وأوراقك، وأهم حاجة خالي من عوامل التشتت.
3-
متذاكرش فترة طويلة من غير راحة، ومتنساش (إن
لبدنك عليك حق)، خد فترة راحة حوالي خمس دقايق كل من 20 ل30 دقيقة، وكل ساعة
مذاكرة متواصلة خد راحة ربع ساعة على الأقل.
4-
اهتم بشرب الماء وتناول الطعام الصحي،
التغذية السليمة والمتوازنة مهمة للحفاظ على صحتك وتركيزك في أحسن حالاتهم.
5-
وسائل التواصل الاجتماعي ممكن تكون مصدر كبير
للإلهاء وضياع الوقت، لذلك يفضل الابتعاد عنها أو إغلاقها تمامًا لتتمكن من تركيز
وقتك ومجهودك على الدراسة.
6-
لو واجهت صعوبة في مذاكرة بعض المواد متتأخرش
في طلب المساعدة من مدرس متخصص في المادة اللي بتواجهك فيها المشكلة.
7-
بعض الطلاب بيحصلوا بشكل أفضل لو ذاكروا في
مجموعات، فلو أنت من النوع ده رتب مع مجموعة من أصدقائك يكونوا قريبين منك في
السكن لسهولة المقابلات واتقابلوا مرة في الأسبوع مثلًا.
8-
متخليش كل مجهودك للمذاكرة، بمعنى مارس
هواياتك بشكل معتدل في أوقات راحتك، ممكن مثلًا تخليها يوم في الأسبوع.
9-
مارس الرياضة بانتظام حتى لو في أبسط صورها
(المشي) لمدة نصف ساعة يوميًا على الأقل، الرياضة بتساعد في الحفاظ على صحتك
ومناعتك.
10- نم مبكرًا واستيقظ مبكرًا، فالحصول على قسط
مناسب من الراحة مهم جدًا للحفاظ على صفاء ذهنك وتركيزك وكمان صحتك وجهازك
المناعي.
11- ذاكر بانتظام وأولًا بأول، مع حل الأسئلة
والتدريبات بعد كل درس حتى لا تتراكم الدروس عليك.
12- متقارنش نفسك بزملائك أو أصدقائك من حيث
مستوى التحصيل أو وصلتوا لفين في المنهج؛ لأن كل واحد مختلف في معدل تحصيله، المهم
تكون ماشي بما يتناسب مع الخطة الزمنية للمنهج اللي أنت حطيتها لنفسك.
13- خليك واثق في نفسك، الثقة بالنفس من أهم
عوامل النجاح.
14- خلي دايمًا في خطة بديلة، لأن الظروف متغيرة
ومش مضمونة.
15- حاول من فترة للتانية تغير مكان مذاكرتك ولو
بشكل مؤقت عشان تفصل وتحس بتغيير المكان.
16- اخرج مع صحابك مرة في الشهر على الأقل؛ لأن الترفيه مهم عشان تقدر تكمل بس متزودش عن مرة في الأسبوع عشان متضيعوش وقت كتير.
في النهاية أحب أقولك إن المشوار مهما كان طويل أكيد له نهاية، وخليك واثق طول ما أنت عملت اللي عليك وتعبت ربنا مش هيضيع تعبك، واختيار ربنا دايمًا أفضل من أي اختيار تاني حتى لو أنت في وقتها مشوفتش ده، هتتأكد منه مع الوقت.
أتمنى لكم جميعًا
كل التوفيق والنجاح، وربنا يكرمكم ويحقق كل أحلامكم.
تعليقات
إرسال تعليق
شاركنا بتعليقاتك