دايمًا بنسمع إن سوق العمل مش مُكتفي حاليًا بالشهادة الجامعية
فقط، لكن لازم نطور من نفسنا ونكتسب مهارات ومعلومات هي اللي تؤهلنا لسوق العمل وكمان
تؤهلنا إننا نطور من نفسنا ونحقق الإنجازات اللي عايزين نوصلها.
هنا تبدأ أهمية الكورسات أو الدورات العلمية باللغة العربية،
لإنها المصدر اللي هنقدر منه نكتسب هذه المهارات وننميها، بجانب طبعًا التدريب وممارسة
هذه المهارات بعد تعلمها.
عشان كده تعالى نتعرف على أفضل 20 كورس قادرين إنهم يفيدوك في
حياتك وينموا مهاراتك الشخصية والعملية، وده اللي هيقدر إنه يخلينا مؤهلين لسوق العمل
.
1. كورس اللغة الإنجليزية: English
Course
اللغات هي تعتبرالمهارات اللي لازم نكون بنتميز بيها دايمًا
وخصوصًا اللغة الإنجليزية؛ لإنها مبقتش مجرد لغة بنتعلمها رفاهية، لا دي بقت أسلوب
حياة حرفيًا، وأي شركة أو مكان عمل بيبقي من متطلبات الوظيفة إن تكون لغتك الإنجليزية
كويسة.
عشان كده لازم نكتسب كلنا هذه المهارة ونخليها لغة ثابتة في
حياتنا.
2. كورس تعلم كيف تتعلم: Learn
how to Learn Course
لما بنيجي نتعلم حاجة جديدة بنبقي على طول تايهين ومش قادرين
نحدد خطة نمشي عليها، ولو حددنا الخطة بنلاقي صعوبة كبيرة في تنظيم الوقت بين الحاجة
الجديدة اللي بنتعلمها وبين الأمور الأساسية اللي في حياتنا زي الدراسة أو الشغل وهكذا.
عشان كده كورس تعلم كيف تتعلم هو من أهم الكورسات اللي لازم
تاخدها لو بتحس بتشتت ولغبطة مع تعلم أي حاجة جديدة.
3. كورس إدارة الوقت: Time
Management Course
اللغبطة والتوهان وعدم إنجاز المهمات كل الأزمات دي نتيجة لعدم
تنظيم وإدارة الوقت، وبسبب إن أغلبنا مش عارفين ينظموا وقتهم ويديروه صح، فكان لازم
أقترح عليكم كورس إدارة الوقت اللي هيأهلك إنك تقدر تنظم وقتك وتقوم بمهامك بفاعلية
ونشاط وتنظيم على طول، وتحقق دايمًا الإنجازات والخطط اللي مأجلها.
4. كورس التفكير الناقد: Critical
Thinking Course
التفكير الناقد من أهم المهارات اللي لازم تكتسبها عشان تنجح
عمومًا سواء في حياتك العملية أو الشخصية، وده لإنه بيخلي عندك القدرة على النظر للأمور
من كل الاتجاهات والحكم عليها بطريقة صحيحة، وكمان بتنمي عندك الجانب الإبداعي جدًا
وده بيفيدك في إنه بيخرجك من نمط الحياة الروتينية المملة.
عشان كده الكورس ده لازم يكون في أولوياتك.
5. كورس الذكاء العاطفي: Emotional
Intelligence Course
ناس كتير مش عندها الذكاء العاطفي في التعامل مع البشر، وده
بيخسرهم كتير جدًا سواء كان علاقات بأشخاص أو فرص عمل وحاجات تانية كتير.
والذكاء العاطفي معناه باختصار إن الشخص يقدر يفهم مشاعر اللي
قدامه ويقدر إنه يحتوي المواقف الصعبة وكمان يقدر إنه يفهم نفسه ومشاعره بتقلباتها
ويتقبلها، عشان كده لازم كلنا تكون عندنا مهارة الذكاء العاطفي للتعامل مع نفسنا ومع
الناس بأفضل طريقة ممكنة.
6. كورس العصف الذهني: Brainstorming
Course
العصف الذهني هو إن الشخص يقوم بإخراج أفضل ما عنده بكل طريقة
ممكنة وترتيبها وتنسيقها عشان ينفذها بأفضل طريقة ممكنة.
عشان كده مهارة العصف الذهني من أهم المهارات اللي لازم تُكتسب
عشان تنظم وتفكر لحياتك صح.
7. كورس مهارة التواصل: Communication
skill Course
التواصل هو أساس أي شئ يحدث بين البشر سواء كان تعاملات شخصية
أو تعاملات عملية أو أي نوع من أنواع التعاملات اللي بتحصل بين البشر.
وعشان كده لازم نكتسب مهارة إزاي نقدر نتواصل بشكل صحيح مع غيرنا
ونوصل المعلومة بطريقة سليمة ليهم من غير أي سوء تفاهم.
8. كورس مهارة التقديم: Presentation
skill Course
إنك تقف تقدم وتشرح مشروع تخرجك أو مشروع في عمل ما، دي مهارة
محتاجة إنها تُكتسب؛ عشان تقدر تشرح بأفضل صورة وتقنع الشخص اللي بيسمعك باللي انت
بتقدمه.
وده اللي كورس ال Presentation Skill بيقدمهولنا.
9. كورس العمل الجماعي: Team
Work Course
سر نجاح أي عمل أو مشروع هو التعاون بين الفريق اللي بيشتغل،
سواء كان في دراسة أو عمل لازم يكون في روح تعاونية وعمل جماعي بين الفريق.
وده ممكن نتعلمه عادي جدًا عن طريق كورس بيشرح إيه هو العمل
الجماعي وإزاي نقوم بيه.
10. كورس مهارة القيادة: Leadership
Skill Course
القيادة مش مجرد منصب وخلاص وإن يكون في ناس بتشتغل تحت منك،
لأ دي مهارة كبيرة جدًا لازم تكون عندك عشان تكون قائد عظيم وقدوة لغيرك وتقدر تحقق
النجاح والإنجازات اللي أنت عايزها وتكون في وسَط مافهوش كره أو حقد ليك.
11. كورس الرخصة الدولية لقيادة جهاز الكمبيوتر: ICDL Course
هو كورس بيقدر إنه يعلمك كل ما يخص الكمبيوتر واستخداماته، زي
برامج ال Office اللي هي: Word/Power point/ Exel وكمان بيقدر يفهمك في استخدامات
الجهاز نفسه، وده اللي محتاجه سوق العمل دلوقتي إنك تكون قادر على استخدام جهاز الكمبيوتر
بشكل سليم.
12. كورس كيفية كتابة السيرة الذاتية: How to write CV
أهم عوامل قبولك في أي وظيفة أو تطوع هو الCV بتاعك، من حيث طريقة كتابته،
تنظيمه، إيه اللي يتكتب فيه وإيه اللي مايتكتبش وطبعًا إيه المهارات والمؤهلات اللي
لازم تكون عندك.
عشان كده لازم نتعلم إزاي نكتب CV بطريقة صحيحة عشان نضمن إننا نتقبل في أي حاجة بنقدملها.
13. كورس مقابلة العمل: Job
Interview
دايمًا نسمع إننا اترفضنا في الإنترفيو بس عمرنا ما سمعنا عن
إننا لازم نتعلم ونجهز كويس أوي للإنترفيو، وده مش معناه المؤهلات والشهادات اللي عندي،
لأ ده معناه إنني أتعلم إزاي أقدر أتكلم في الإنترفيو وإيه الحاجات اللي أعملها وإيه
اللي ماعملهاش والبس ايه واقعد إزاي وهكذا.
فده يعتبر مهارة لازم نتعلمها ونكتسبها كلنا عشان نضمن إننا
نقدر نعدي من مقابلة العمل بسلام ونتقبل في الوظيفة بقدر الإمكان.
14. كورس تخصص في بناء حياة مهنية ناجحة: Career Success Specializations Course
إنك توصل للنجاح في الحياة المهنية وتبني كاريير ده مهارة كبيرة
في حد ذاتها لازم نتعلمها ونتقنها جدًا كمان.
عشان كده موقع كورسيرا بيقدم الكورس ده عشان يخليك شخص مؤهل
إنك تبني كاريير ناجح ليك وكمان تكون متخصص وتعلم غيرك.
15. كورس تصميم الجرافيك: Graphic
Design Course
الحياة دلوقتي مابقتش متوقفة على الشغل التوظيفي الروتيني بس،
لكن انتشر كمان العمل الحر اللي تقدر من خلاله تتعلم مهارة جديدة وتكون بتحبها وتشتغلها.
ومن المهارات دي مهارة الجرافيك ديزاين اللي تقدر تشتغل بيها
وتحقق ربح كبير وأنت في بيتك واللي بتكون مسئولة عن تصميم اللوجو والإعلانات وحاجات
كتير تانية.
عشان كده لو مهتم بالمجال ده فأنصحك وبشدة إنك تتعلمه لإنك هتحبه
على طول.
16. كورس صناعة المحتوى: Content
Creation Course
صناعة المحتوى من المجالات المشهورة برده جدًا في العمل الحر،
ودي بتكون متخصصة في كل ما له علاقة بالمحتوى زي: الكتابة، المونتاج والتصوير وغيرها
كتير من التخصصات المختلفة في صناعة المحتوى.
فلو حاسس إن ده مكانك وعندك فضول عن صناعة المحتوى فلازم تبدأ
بالكورس اللي يأهلك إنك تكون صانع محتوى عظيم في المستقبل.
17. كورس البرمجة: Programming Course
البرمجة بقت هي اللي محتلة العرش دلوقتي نظرًا للتطور التكنولوجي
الكبير اللي بنعيشه حاليًا، عشان كده هي من المجالات الناجحة جدًا والمطلوبة جدًا في
الوقت الحالي.
وعشان تتعلمها لازم تتعلم الأساسيات لأن ببساطة البرمجة دي عالم
كبير وتخصصات كتير فلازم تبدأ بالأساس عشان تبني عليه قدام.
18. كورس التسويق الرقمي: Digital
Marketing Course
في العالم الافتراضي اللي عايشين فيه دلوقتي كان لازم إننا نحول
جزء كبير من حياتنا للعالم ده ونشتغل ونطور من نفسنا فيه، وعشان مجال التسويق موجود
من زمان وعشان دلوقتي بقى أغلب تعاملات البيع والشراء بقت أونلاين، كان لازم يبقي في
مجال جديد يقدر يواكب التطور ده وهو التسويق الرقمي.
وده من خلاله بتقدر تسوق للمنتجات أونلاين عن طريق تقديم محتوى
يهم العميل ويكون الأسلوب سهل ومقنع، وكل ده ممكن تتعلمه وتشتغل بيه زي أي مجال تاني.
19. كورس الماركة الشخصية: Personal
Branding Course
إنك تعمل من نفسك ماركة الناس تتكلم عنها ده من طرق التسويق
للنفس، ومعني إنك تعمل ماركة شخصية لنفسك إنك لما حد يذكر المهنة أو المجال اللي بتشتغل
فيه يكون اسمك هو أول اسم مذكور، زي مثلًا لما أقولك مجال طب جراحة القلب أول اسم هييجي
في بالك هو اسم الدكتور مجدي يعقوب؛ وده لأنه نجح وقدر يصنع اسمه في المجال ده فبالتالي
بقى قدوة ومثال للمهنة والمجال ده.
وده باختصار ال Personal Branding وهو علم زي أي علم ممكن نحققه عن طريق تعلمه.
20. كورس الإسعافات الأولية: First Aid Course
الإسعافات الأولية لازم نكون كلنا عارفينها ومتعلمينها، لإن
بالمعرفة دي نقدر إننا ننقذ حياتنا وحياة المقربين مننا عن طريق إن يكون عندنا علم
بالحاجات المفروض نعملها لو تعرض أي حد حوالينا لأي إصابة أو جرح وده لحد ما نقدر إننا
نوصله للمستشفى.
عشان كده لازم كلنا ناخد كورس يقدر يأهلنا إننا نقدر نقدم التصرف
الأوليّ لأي إصابة أو جرح ممكن إحنا أو اللي حوالينا نتعرضله.
وفي النهاية، نقدر نقول إننا بالكورسات دي هنقدر نحقق جزء كبير
جدًا في تطويرنا لنفسنا، لكن عشان نحقق ده بصورة كاملة لازم يكون في تدريب وممارسة
مستمرة لكل علم احنا بنتعلمه.
تعليقات
إرسال تعليق
شاركنا بتعليقاتك